Mkuu wa mkoa wa Pwani mhandisi Evarist Ndikilo akizungumza baraza la wafanyakazi mkoani humo katika kipindi cha mwaka 2016/2019(picha na Mwamvua Mwinyi)
 |
| Afisa kutoka ofisi ya waziri mkuu kazi, ajira,vijana na wenye ulemavu ,Honesta Ngolly akizungumza jambo baada ya kufunguliwa kwa baraza la wafanyakazi mkoani Pwani katika kipindi cha mwaka 2016/2019(picha na Mwamvua Mwinyi) |
Na Mwamvua Mwinyi, Pwani
MKUU wa mkoa wa Pwani mhandisi Evarist Ndikilo, amewataka maafisa utumishi kuwapa nafasi baadhi ya wafanyakazi wanaoomba kwenda kujiendeleza kitaaluma badala ya kuwabania na kusababisha kudumaa kielimu.
Aidha ametoa rai kwa watumishi wa umma mkoani humo kuwajibika kwenye maeneo yao ya kazi pamoja na kuwatumikia wananchi kikamilifu.
Mbali na hayo mkuu huyo wa mkoa ,amesisitiza viongozi mbalimbali kwenye maeneo ya kazi kujenga ushirikiano wa kutosha na wafanyakazi /watumishi ili kuondoa malalamiko ambayo huwa yakijitokeza .
Mhandisi Ndikilo aliyasema hayo ,wakati akifungua baraza la wafanyakazi mkoani Pwani mwaka 2016-2019 pamoja na kuchagua katibu na katibu msaidizi wa baraza hilo.
Hata hivyo alisema ni lazima kukubaliana na mabadiliko na kwenda na wakati kwa kukuza taaluma za watumishi ili kuongeza uwezo kwenye maeneo yao ya kazi .
"Kiukweli tuliyojifunza darasani isiwe mwisho badala yake tuongeze elimu zetu kwa lengo la kupanua elimu zetu ambazo wengi wetu tumezipata miaka mingi iliyopita" alisema.
Mhandisi Ndikilo, alieleza kuwa ifikie wakati wa kujitambua na kuthamini nafasi walizonazo na kutamani kufika kwenye hatua nzuri ya kielimu.
Akizungumzia suala la uwajibikaji aliwaomba maafisa utumishi na makatibu tawala wilaya na mkoa waendelee kuwa wawakilishi wakubwa wa kuwasilisha kero zinazowakabili watumishi .
Alisema uwajibikaji kazini ni nguzo pekee ya ufanisi kazi hivyo kuna kila sababu ya viongozi kuwa na ushirikiano na watumishi .
"Wote tupo sawa na kila mmoja anafanyakazi kwenye nafasi yake ,hakuna mkubwa zidi ya mwenzie kwa kumfanya mwengine amsujudie hadi kuogopana kazini.
" Kikubwa ni kuheshimiana ,kuwa na upendo na kuthaminiana bila kudharauliana ama kutokana na nafasi yako ya juu ndio ukandamize wengine.alisisitiza.
Nae afisa kutoka ofisi ya waziri mkuu ,kazi,ajira,vijana na wenye ulemavu ,Honesta Ngolly aliyataka mabaraza ya wafanyakazi yatumie meno yake kusimamia kero za wafanyakazi.
Alisema watumishi wana haki ya kujiendeleza kielimu na hakuna serikali ambayo imekataza watumishi kujiendeleza.
Honesta alisema endapo watumishi watakuwa wakiongeza elimu zao itawezesha kuongeza ufanisi makazini.
Mwenyekiti wa baraza la wafanyakazi mkoani Pwani Edward Mwakipesile alisema mawazo na maagizo waliyopewa watayafanyia kazi ili kulinda maslahi na haki za watumishi.
Mwakipesile aliomba ushirikiano na uwajibikaji uendelee katika mkoa huo ili kupiga hatua kutoka mkoa ulipo na kuwatumikia wananchi .
Awali kabla ya kufunguliwa baraza hilo Pascal Dawson alichaguliwa kuwa katibu wa baraza la wafanyakazi mkoani hapo na katibu msaidizi Asha Itelewe.
Mwisho
Post a Comment