CURRENT NEWS

Friday, June 8, 2018

EPICOR 10.2 NI SULUHISHO NA AHUENI KWETU-WAWEKA HAZINA


 Ndugu Emmanuel Richard Mhasibu wa wa Halmashauri ya Bariadi, akifanya mahojiano na Atley Kuni Afisa habari OR TAMISEMI jijini Mwanza wakati wa Mafunzo ya Epicor 10.2 (Picha na Gladys Mkuchu-PS3)
Zubeda Nkuba Mhasibu wa  Matumizi kutoka Manispaa ya Jiji, akielezea faida za mfumo wa Epicor 10.2 na maboresho muhimu yaliyofanyika (Picha na Atley Kuni- OR TAMISEMI) 

........................................................................................
Na. Atley Kuni- OR TAMISEMI

Waweka hazina pamoja na Wahasibu kutoka katika Halmashauri za Mikoa ya Mwanza na Simiyu wanaoendelea na mafunzo ya mfumo wa Uhasibu na uandaji wa taarifar (Epicor 10.2) wamekiri kuwa mfumo ni mwepesi na utawaongezea tija na kuleta ufanisi katika utendaji wao za kazi wa kila siku.

“Hivi sasa jukumu langu kubwa litakuwa kuhakikisha taarifa zangu za ukusanyaji mapato kutoka katika mfumo wa LGRCIS zinakuwa sahihi na  mfumo kwa namna ulivyo tengenezwa utakuwa na uwezo wa “ku-post” wenyewe kila inapofika saa 6.00 za usiku” anasema Rahabu Daudi ambaye ni mhasibu wa Halmashauri wa Wilaya ya Busega.

Maelezo hayo ya Rahabu Daudi hayatofautiani sana na  Kessy Mpakata Mweka hazina katika Jiji la Mwanza yeye alisema “Mfumo wa Epicor 10.2 sasa unaunganishwa na mifumo mingine kama PlanREp iliyoboreshwa, LGRCIS, FFARS na GoTHoMIS ambayo itakuwa ni msaada mkubwa katika kuongeza tija na ufanisi, kufikia mpaka katika ngazi za kutolea huduma”

Waweka Hazina hao wanasema kuwa, utaratibu wa kuanza kutumika kwa mfumo huo wa Epicor 10.2  itasaidia hata katika suala zima la urejeshwaji wa masarufu kwa wakati, kwakuwa mfumo hautaruhusu mtumishi kuchukua masarafu mapya kabla yakufanya marejesho ya awali.

“Hivi sasa (imprest)  masarufu yote yatapita katika mfumo wa (Epicor 10.2) kwa maana hiyo kabla yakuchukua masarufu mapya mfumo utakuuliza juu ya masarufu ya awali kama hujafanya marejesho mfumo hauta kukubalia, hali hii itakuwa ni ahueni katika utendaji na itasaidia hata kupunguza hoja za ukaguzi” alisema Mpakata.

Jambo lingine linalo onekana kuwa litasuluhishwa ni suala la uhamishaji fedha kutoka fungu moja kwenda fungu jingine (realocation), jukumu kubwa litakalo bakia mikononi mwa Mtunza hazina ni kusaini yaani  (Approve) na hivyo kuondosha malalamiko mengi miongoni mwa waweka hazina na kukomesha urasimu usikuwa wa lazima, anasimulia Mpakata.

Journey Kivaula ni Mweka hazina katika Halmashauri ya Maswa yeye anasema katika mfumo wa sasa, mipango na bajeti itakwenda na uhalisia kutokana na kwamba vifungu  vitakavyokuwa vimebajetiwa ndivyo hivyo hivyo vitakavyo tumika. Kwa  utaratibu wa sasa wakuhamisha fedha za matumizi X kuhamishia kwenye matumizi Y, hilo halitakuwepo na kwa hali hiyo kadhia hiyo haitakuwepo tena, shabaha nikuondokana na hoja za mara kwa mara lakini pia kupunguza matumizi ambayo hayakubajetiwa.

Mhasibu kutoka jijini Mwanza, Zawadi Jabri, alisema Epicor 10.2 ni mfumo wenye kasi na uliongeza ufanisi kwakuwa ni (Web-based) tofauti na ilivyokuwa hapo awali kwenye Epicor 9.5 na mifumo mingine mingine iliyotangulia ambayo ilikuwa na ukomo (limit) sambamba na kubaguliwa kwa baadhi ya vitu,  Epicor 10.2  kwa sasa itapatikana sehemu yoyote na hivyo kurahisha utendaji wa kazi zao za kila siku.

Sambamba na maboresho hayo Zawadi alisema suala la kuunganishwa na mifumo mingine kama FFARS ambayo inaanzia ngazi ya msingi za kutolea huduma ni neema nyingine itakayo chagiza ubora wa mfumo huo pamoja na kuharakisha kasi ya maendeleo kwa wananchi tunao wahudumia.

 “Kuunganishwa kwa mfumo wa FFARS, itatusaidia sisi wahasibu kujua mapato kutoka ngazi ya msingi ya kutolea huduma kama vituo vya afya na Shule na itaturahisishia kujua mapato na matumizi ya mfumo huo wa FFARS” aliongeza Zawad Jabri.

Wakizungumzia juu ya maboresho ya msingi katika mfumo huo, wahasibu wawezeshaji kutoka Ofisi ya Rais TAMISEMI, Stanslaus Msenga na Melkzedek Kimaro katika kituo cha Mwanza, walisema mfumo huo kwa sasa utaunganishwa na mifumo mingine yote ya msingi ya usimamizi wa fedha na hivyo utakuwa na uwezo wakuwafanya walipaji kama mabenki kulipana kwa njia ya kieletroniki ya (TISS) lakini pia mfumo huo utahusisha muundo  mpya wa uhasibu wa (New Chart of Account) pamoja na Kasma mpya ya 2014 (GFS).

Akitoa rai kwa wataalam wa fedha wanaoendelea na kikao katika kituo cha Mwanza, Mtaalam mshauri kutoka PS3 Ng’wananyamate Langalanga Mgengeli Mihayo, alisema kutokana na hitilafu nyingi zilizosababishwa katika kipindi cha nyuma kama uwepo  hati zenye mashaka na/ au chafu na makandokando mengine kupitia Epicor 10.2 itasaidia kusuluhisha cha msingi wazingatie elimu hii wanayopewa na kuieneza huko kwenye Halmashauri zao.

“Rai yangu kwa Wataalam wa fedha ni kuwa, wazingatie mafunzo hayo kwa umakini ili yaweze kuwaongezea weledi katika utendaji wao hususan suala zima la ukusanyaji mapato kwa njia ya mifumo na kutolea taarifa sahihi kupitia mifumo yote ya msingi iliyopo kwenye Halmashauri” Alisema Mgengeli.

Wakihitimisha mahojiano hayo, wataalam hao wa fedha hawakuacha kuushukuru mradi wa uimarishaji wa mifumo ya sekta ya umma (PS3) pamoja na Ofisi ya Rais TAMISEMI kwa jinsi wanavyo endelea kutafuta mbinu mbali mbali kwa mustakabali wa kuboresha mifumo ya umma na kuwaletea maendeleo watanzania.

“Watanzania nilazima tuelewe hakuna mabadiliko yanayokuja kirahisi, tukisikia nchi zilizo endelea ni kwamba, wananchi na viongozi walikubali mabadiliko ya kweli, na Rais wetu Mhe. Dkt. John Pombe Magufuli na Serikali yake huko ndipo wanapo taka na sisi tufike, hivyo kila mmoja wetu awe tayari kumuunga Mkono Mhe. Rais na watendaji wake wote kwa manufaa ya Taifa letu” alihitimisha Mpakata

Mafunzo ya juu ya mfumo wa Epicor 10.2 yanaendeshwa katika vituo mbalimbali nchini yanatarajia kuwafikia watumishi wa umma 950 wa kada za uhasibu kutoka Mamlaka za Serikali za Mitaa 185 na yanaendesha na Ofisi ya Rais TAMISEMI pamoja na Serikali ya Marekani kupitia mradi wa USAID wa Uimarishaji wa Mifumo ya Sekta za Umma (PS3) kwa Mikoa ya Mwanza, Kagera, Dodoma, Iringa, Mtwara na Mbeya.

 
Copyright © 2014 Mkono Wangu Production Designed by EvMak Tanzania